Chhatrapti Sambhajinagar: छत्रपती संभाजीनगरमधून एक हृदयद्रावक घटना समोर आली आहे. भाजीत केस सापडल्याच्या क्षुल्लक कारणावरून पतीने मारहाण केली, पती आणि सासरच्या लोकांच्या सततच्या अत्याचाराला कंटाळून ईश्वरी बनकर हिने गळफास घेतला. या घटनेनंतर कुटुंबीयांनी घाटी येथे ठिय्या देऊन सासरच्यांवर कठोर कारवाईची मागणी केली. पोलिसांनी त्वरित कारवाई करत पतीसह सात जणांना अटक केली आहे.
ईश्वरी बनकर (वय २५) हिचा विवाह २८ जून २०२० रोजी छत्रपती संभाजीनगरमधील अजय अशोक बनकर याच्याशी झाला होता. दोघेही भावसिंगपुऱ्यातील श्रावस्ती कॉलनीत राहत होते. मात्र, लग्नानंतर लवकरच अजयला दारूचे व्यसन आणि हिंसक वर्तन यामुळे वैवाहिक आयुष्य कोलमडले. तो रोज रात्री उशिरा दारू पिऊन घरी येत असे आणि ईश्वरीला शिवीगाळ व मारहाण करत असे. तिच्यावर शारीरिक व मानसिक अत्याचार करत होता. ईश्वरीने हा प्रकार आपल्या पालकांना सांगितला. त्यांनी नवऱ्याला समजावून सांगून पुन्हा एकत्र राहण्याचा सल्ला दिला, मात्र अजयच्या वर्तनात कोणताही बदल झाला नाही. उलट सासरकडील अन्य नातेवाईकही वारंवार येऊन तिला मानसिक त्रास द्यायचे.
हुंड्याची मागणी आणि विकत घेतलेल्या प्लॉटचे हप्तेही वडिलांकडून?
मृत तरुणीच्या वडिलांनी मुलीचे लग्न मोठ्या थाटात केले होते. अजयला ५ ग्रॅम सोन्याची अंगठी, २ तोळ्यांची साखळी, ईश्वरीसाठी ५ तोळे सोने, २ लाख रुपये रोख हुंडा, फ्रिज, कूलर, सोफासह सर्व घरगुती साहित्य लग्नात देण्यात आले होते. तरीही अजय हा आपल्या पत्नीवर माहेरून पैसे आणण्यासाठी सतत दबाव टाकत असे. त्याने विकत घेतलेल्या प्लॉटचे हप्तेही तिच्या वडिलांनाच भरण्याची मागणी केली होती.
हे पण वाचा
आधीही केला होता आत्महत्येचा प्रयत्न
या सगळ्या छळाला कंटाळून ईश्वरीने यापूर्वीही एकदा आत्महत्येचा प्रयत्न केला होता. तेव्हा कुटुंबीयांनी सर्वजण एकत्र येऊन समजावून तिला पुन्हा सासरी पाठवले. पण ६ एप्रिलच्या रात्री ११ वाजता जेवणात केस निघाल्याच्या कारणावरून अजयने तिला मोठ्या प्रमाणात मारहाण केली. ७ एप्रिललाही त्याने हिंसा चालूच ठेवली आणि गंभीर आरोपही केले. या सततच्या त्रासाला कंटाळून ईश्वरीने मंगळवारी गळफास घेऊन आपले आयुष्य संपवले.
शवविच्छेदनावेळी संताप, पोलिसांची तत्पर कारवाई
बुधवारी (ता. ८) शवविच्छेदन करत असताना ईश्वरीच्या कुटुंबीयांनी संताप व्यक्त केला. त्यांनी सासरच्यांविरोधात कठोर कारवाईची मागणी करत घाटी येथे ठिय्या दिला. पोलिसांनी तातडीने गुन्हा दाखल करत अटक प्रक्रिया पूर्ण केली.
१० एप्रिलपर्यंत सात जण पोलिस कोठडीत
या प्रकरणी ईश्वरीचा पती अजय अशोक बनकर (३०) याच्यासह खालील सहा जणांना अटक करण्यात आली आहे:
-
दिनेश दिलीप बनकर (३५)
-
दिलीप दशरथ बनकर
-
चंद्रमणी दशरथ बनकर
-
छाया चंद्रमणी बनकर
-
आशिष चंद्रमणी बनकर
-
गणेश दिलीप बनकर
यांच्यावर आत्महत्येस प्रवृत्त करण्याचा गुन्हा दाखल करण्यात आला आहे. अजय हा महापालिकेच्या घनकचरा विभागात प्रभारी जवान म्हणून कार्यरत आहे. न्यायालयाने सर्व आरोपींना १० एप्रिलपर्यंत पोलिस कोठडीत राहण्याचे आदेश दिले आहेत.
