संपूर्ण जगाने नुकताच एका मोठ्या युद्धातून सुटकेचा निश्वास घेतला, तोच पूर्व आशियातून पुन्हा धोक्याचे संकेत मिळू लागले आहेत. इराण-अमेरिका युद्धबंदीची घोषणा झाल्यानंतर काही तासांतच उत्तर कोरियाने आक्रमक भूमिका घेतली आहे. हुकूमशहा किम जोंग उनच्या नेतृत्वाखालील उत्तर कोरियाने पूर्व किनारपट्टीवरून अनेक बॅलेस्टिक क्षेपणास्त्रे डागून जगात पुन्हा खळबळ उडवली आहे.
अचानक मिसाइल चाचणी
उत्तर कोरियाच्या या कृतीमुळे पूर्व आशियातील तणाव पुन्हा वाढला आहे. दक्षिण कोरिया आणि जपान – हे दोन्ही देश तात्काळ अलर्ट मोडवर आले आहेत. दक्षिण कोरियाच्या संयुक्त प्रमुख सैन्य दलाने (JCS) दिलेल्या माहितीनुसार, उत्तर कोरियाने आपल्या पूर्व किनारपट्टीवरील वोनसॅन शहराजवळून अनेक शॉर्ट-रेंज बॅलेस्टिक मिसाइल्स प्रक्षेपित केल्या.
या क्षेपणास्त्रांनी समुद्रात कोसळण्याआधी सुमारे 240 किलोमीटरचे अंतर पार केले. गेल्या दोन दिवसांत ही दुसरी मिसाइल चाचणी असल्याचेही दक्षिण कोरियाने स्पष्ट केले आहे.
क्षेपणास्त्र प्रक्षेपणानंतर लगेचच जपाननेही आपली हवाई संरक्षण यंत्रणा सतर्क केली. दोन्ही देशांनी परिस्थितीवर लक्ष ठेवले आहे. सुदैवाने ही सर्व क्षेपणास्त्रे समुद्रात पडल्याने कोणतीही जीवितहानी झाली नाही आणि मोठा अनर्थ टळला.
इराण-अमेरिकाचा आजपासून युद्धविराम
उत्तर कोरियाचे हे पाऊल विशेषतः धक्कादायक ठरले कारण आजच मध्य पूर्वेतील एका मोठ्या युद्धाला विराम मिळाला आहे. इराण आणि अमेरिका-इस्रायल यांच्यात सुरू असलेल्या युद्धाला ३८ दिवसांनंतर युद्धविराम (Ceasefire) लागला आहे.
या युद्धामुळे जगभरात इंधनाची टंचाई, एलपीजी गॅसच्या किमती वाढल्या होत्या आणि सामान्य नागरिक हैराण झाले होते. शिवाय स्ट्रेट ऑफ हॉर्मुज बंद झाल्यामुळे तेलपुरवठा धोक्यात आला होता. मात्र, आता ही वाहिनी सर्वांसाठी खुली करण्याच्या अटीवर अमेरिका व इस्रायल युद्धबंदीला तयार झाले.
अशा सकारात्मक घडामोडीतून जगाने सुटकेचा श्वास सोडला नाही तोच उत्तर कोरियाच्या मिसाइल चाचणीने पुन्हा एकदा अस्वस्थता निर्माण केली आहे.
पूर्व आशियातील भविष्यातील परिणाम
तज्ज्ञांच्या मते, उत्तर कोरियाची ही मिसाइल चाचणी ही केवळ लष्करी ताकद दाखवण्यासाठी नसून, आंतरराष्ट्रीय राजकारणात आपले वर्चस्व नोंदवण्याचा एक डाव असू शकतो. विशेषतः जेव्हा जगाचे लक्ष मध्य पूर्वेकडे लागलेले होते, तेव्हा किम जोंग उन यांनी मिसाईलचे परीक्षण करून जागाच लक्ष आपल्याकडे वेधून घेतले आहे.
दक्षिण कोरिया आणि जपानने या घटनेनंतर संयुक्तपणे संरक्षण पातळी वाढवली आहे. अमेरिकेकडूनही या घटनेवर नजर ठेवली जात आहे.
एकीकडे मध्य पूर्वेतील युद्ध थांबल्याने जगाला दिलासा मिळाला आहे, तर दुसरीकडे उत्तर कोरियाच्या आक्रमक मिसाइल चाचणीने पूर्व आशियातील तणाव पुन्हा वाढला आहे. पुढील काही दिवसांत या घटनेचे दूरगामी परिणाम दिसू शकतात. पण सध्या सर्वांचे लक्ष आता किम जोंग उनच्या पुढील हालचालीकडे लागले आहे.
