वारकरी संप्रदायात घुसखोरी करणाऱ्या महाराजांची यादी राष्ट्रवादी शरद पवार गटाचे प्रवक्ते विकास लवांडे यांनी सोशल मीडियावर सार्वजनिक केल्यानंतर मोठा राजकीय आणि धार्मिक वाद निर्माण झाला आहे. या यादीमुळे आक्रमक झालेल्या वारकरी संप्रदायाने लवांडे यांच्या तात्काळ अटकेची मागणी केली आहे. पंढरपूर येथे झालेल्या संत मंडळींच्या बैठकीत राज्यभर तीव्र आंदोलनांचा इशारा देण्यात आला आहे.
पंढरपूरमध्ये संत मंडळींची तातडीची बैठक
पंढरपूर येथील संत कबीरदास महाराज यांच्या मठात आज वारकरी संप्रदायातील फडकरी, दिंडीकरी, विविध संघटना तसेच संतांचे वंशज यांची तातडीची बैठक घेण्यात आली. या बैठकीत विकास लवांडे यांच्या वक्तव्याविरोधात आक्रमक पवित्रा घेण्यात आला.
बैठकीत उपस्थित संत मंडळींनी लवांडे यांनी ज्या संतांची नावे ‘घुसखोर’ म्हणून जाहीर केली आहेत, त्यासंदर्भात त्वरित पायावर डोके ठेवून माफी मागण्याची मागणी केली. तसेच लवांडे यांना तात्काळ अटक करण्याची मागणीही करण्यात आली.
शासनाला वारकरी संप्रदायाचा इशारा
या बैठकीत वारकरी संप्रदायाच्या वतीने शासनाला स्पष्ट इशारा देण्यात आला की, लवांडे यांच्यावर कारवाई न झाल्यास संपूर्ण राज्यभर तीव्र आंदोलने उभी करण्यात येतील.
वारकरी संप्रदाय सहसा संयमी म्हणून ओळखला जातो, मात्र वेळ आल्यास तो ‘वज्रा’ होऊनही कठोर भूमिका घेईल, असे या बैठकीत स्पष्ट करण्यात आले. यातून राज्यात कायदा व सुव्यवस्थेची परिस्थिती बिघडल्यास त्याची जबाबदारी शासनाची असेल, असा इशाराही देण्यात आला.
आज पंढरपूर पोलीस ठाण्यात लवांडे यांच्याविरोधात निवेदन देण्यात येणार असून, त्यानंतरही कारवाई न झाल्यास आंदोलनाची रणनीती आखण्यात येईल.
शरद पवारांच्या वक्तव्यानंतर लवांडे यांची यादी
उल्लेखनीय म्हणजे, यापूर्वीच राष्ट्रवादी काँग्रेसचे ज्येष्ठ नेते शरद पवार यांनी वारकरी संप्रदायात प्रतिगामींची घुसखोरी वाढल्याचे आणि त्यामुळे धर्मांध शक्तींना बळ मिळत असल्याचे मोठे विधान केले होते. शरद पवार यांच्या या वक्तव्यानंतर राजकीय वर्तुळात जोरदार चर्चा सुरू झाल्या होत्या.
त्यानंतरच पक्षाचे प्रवक्ते विकास लवांडे यांनी थेट वारकरी संप्रदायातील 20 घुसखोरांची नावे जाहीर करत हा वाद और तीव्र केला. या यादीत अनेक संत व महंतांचा समावेश असल्याने वारकरी संप्रदायाने हा आपला थेट अपमान असल्याचे म्हटले आहे.
हे पण वाचा
शिवनिका ट्रस्टचे संचालक जितेंद्र शेळके यांचा अपघाती मृत्यू….पत्नीही ठार.. वाचा सविस्तर…
आता राष्ट्रवादी काँग्रेस (शरद पवार गट) आणि वारकरी संप्रदाय यांच्यातील संघर्ष अधिक तीव्र होण्याची शक्यता आहे. एकीकडे वारकरी संप्रदाय आंदोलनाच्या हाका देत असतानाच, दुसरीकडे लवांडे यांच्या भूमिकेला पक्षाचे वरिष्ठ नेते कितपत पाठिंबा देतात, याकडे सर्वांचे लक्ष लागले आहे.
दरम्यान, वारकरी संप्रदायाची ही भूमिका पाहता राज्य सरकारवर कारवाईचा दबाव निर्माण झाला आहे. पुढील काही दिवसांत या प्रकरणी कोणते निर्णय घेतले जातात, यावरून राज्यातील सामाजिक आणि राजकीय वातावरण कसे राहील, हे ठरेल.
