नाशिक शहरातील एका नामांकित आयटी कंपनीतील धर्मांतर आणि लैंगिक छळवणुकीचे प्रकरण अद्याप ताजे असतानाच, पंचवटी परिसरातून आणखी एक खळबळजनक घटना समोर आली आहे. येथे एका तरुणीला बळजबरीने दारू आणि सिगारेट देऊन अचेत केले गेले, तिच्यावर वारंवार अत्याचार करण्यात आला. शिवाय तिला धर्मांतरासाठी प्रवृत्त करताना तिच्या धार्मिक भावनाही दुखावल्या गेल्या. या प्रकरणी पंचवटी पोलिसांनी संशयित आरोपी तंजीर इनामदार याला अटक करून न्यायालयात हजर केले असता, त्याला पाच दिवसांची पोलीस कोठडी सुनावण्यात आली आहे.

पीडितेने पोलिसात दिला धक्कादायक खुलासा

पीडित तरुणीने पंचवटी पोलीस ठाण्यात दिलेल्या तक्रारीनुसार, आरोपी तंजीर इनामदार याने लग्नाचे आमिष दाखवून तिला विविध ठिकाणी नेले. तेथे तिला बळजबरीने मद्यपान आणि सिगारेट ओढण्यास भाग पाडले. पीडिता शुद्धीत नसताना तिच्यावर वारंवार लैंगिक अत्याचार करण्यात आला. या प्रकरणी पोलिसांनी गुन्हा दाखल करून आरोपीला ताब्यात घेतले.

 तुळशीमाळ अन् धागा फाडून धर्मांतराचा दबाव

या घटनेतील सर्वात धक्कादायक बाब म्हणजे, आरोपीने पीडितेच्या धार्मिक ओळखीवरच हल्ला चढविला. त्याने तिच्या गळ्यातील तुळशीमाळ आणि हातावरील धार्मिक दोरा जबरदस्तीने तोडून फेकला. पीडितेला एका विशिष्ट धर्माच्या रिवाजानुसार ‘गजवा-ए-हिंद’चे पालन करण्याचे सांगितले जात, तिला धर्मांतरासाठी प्रचंड मानसिक दबावाखाली आणले गेले.

 ‘लव्ह बाईट’च्या नावाखाली ब्लॅकमेलिंग

गेल्या जानेवारी २०२६ मध्ये आरोपीने पीडितेच्या गळ्याजवळ चावा घेऊन हे ‘लव्ह बाईट’ असल्याचे सांगितले. त्यानंतर तिचे आक्षेपार्ह फोटो मोबाइलमध्ये कैद केले. हे फोटो सोशल मीडियावर व्हायरल करण्याची तसेच तिच्या कुटुंबाची बदनामी करण्याची धमकी दिली. या धमकीच्या जोरावर तिला वारंवार विविध लॉजवर नेऊन बळजबरीने शारीरिक संबंध ठेवण्यात आले.

 केवळ एक तक्रार नव्हे, अनेक मुली बळी असण्याची शक्यता

पोलिसी तपासातून असे समोर आले आहे की, संशयित तंजीर इनामदारने अशाच पद्धतीने शहरातील इतर काही तरुणींनाही आपल्या जाळ्यात ओढून त्यांचे शोषण केले असण्याची शक्यता आहे. सध्या पोलिसांनी केवळ एकाच तक्रारीवरून गुन्हा दाखल केला आहे, मात्र या प्रकरणाची व्याप्ती अधिक मोठी असू शकते. पोलिसांनी सर्व बाजूंनी तपास सुरू केला आहे.

हे पण वाचा 

शिवनिका ट्रस्टचे संचालक जितेंद्र शेळके यांचा अपघाती मृत्यू….पत्नीही ठार.. वाचा सविस्तर…

विकास लवांडे यांच्या ‘घुसखोर’ यादीमुळे वारकरी संप्रदायात संताप, अटकेची मागणी

न्यायालयातील दोन्ही बाजूंचे युक्तिवाद

 सरकारी पक्षाची मागणी

न्यायालयात सरकारी वकिलांनी पुढील मुद्दे मांडले:

• आरोपी तंजीर इनामदार याच्या पोलीस कोठडीची आवश्यकता

• त्याने पीडितेला महागड्या लॉजमध्ये नेऊन दारू आणि सिगारेटचा वापर करण्यास भाग पाडले

• हे प्रकरण अलीकडे समोर आलेल्या टीसीएस घटनेप्रमाणेच गंभीर आहे

• धर्मांतरासाठी पीडितेवर जोरदार दबाव आणला

• आणखी काही तरुणी फसवल्या गेल्या आहेत का, याचा तपास व्हावा

• महाविद्यालयीन शिक्षण घेत असताना त्याच्याकडे इतपत पैसे कुठून आले, यात त्याचे अन्य साथीदार आहेत का, याचा शोध घेणे आवश्यक आहे

 आरोपीच्या वकिलांचा बचाव

दुसरीकडे, आरोपीच्या वकिलांनी पुढील युक्तिवाद केला:

• दोघेही अभियांत्रिकीचे विद्यार्थी असून परस्पर संबंध होते

• जानेवारीमध्ये अत्याचार झाला असेल तर एवढा कालावधी का गाळला?

• फोटो काढून धमकावल्याचा कोणताही ठोस पुरावा नाही

• दोघांमध्ये प्रेमसंबंध होते, मात्र घरच्यांच्या विरोधामुळे आता हे आरोप केले जात आहेत

• पोलीस कोठडीची आवश्यकता नसून सिगारेट पार्टीचा कोणताही पुरावा उपलब्ध नाही

न्यायालयाचा निर्णय

दोन्ही बाजूंचा युक्तिवाद ऐकून घेतल्यानंतर न्यायालयाने आरोपी तंजीर इनामदार याला पाच दिवसांची पोलीस कोठडी सुनावली. पोलिसांनी सध्या पुढील तपास सुरू केला असून, आरोपीकडे अधिक माहिती मिळविण्याचा प्रयत्न केला जात आहे. या प्रकरणामुळे नाशिक शहरात एकच खळबळ उडाली आहे.