आयपीएल २०२६ च्या सुरुवातीला मुंबई इंडियन्सने चांगली सुरुवात केली. मात्र त्यानंतरच्या तीन सामन्यांत संघाला पराभवाचा सामना करावा लागला. या दरम्यान रोहित शर्माच्या दुखापतीमुळे संघाचे डोकेदुखी वाढली आहे. आरसीबीविरुद्धच्या सामन्यात फलंदाजी करताना रोहितला पायाच्या हॅमस्ट्रिंगमध्ये त्रास झाला. त्यामुळे त्याला सामना अर्धवट सोडून मैदानाबाहेर जावे लागले. आता या दुखापतीची गंभीरता तपासण्यासाठी त्याला रुग्णालयात जाऊन स्कॅनिंग करावे लागणार आहे.
रोहित शर्माच्या दुखापतीचा क्षण
मुंबई इंडियन्सचा चौथा सामना वानखेडे स्टेडियमवर रॉयल चॅलेंजर्स बंगळुरूविरुद्ध झाला. या सामन्याच्या पाचव्या षटकात कृणाल पांड्या गोलंदाजी करत होता. त्याच्या एका चेंडूवर धाव घेत असताना रोहित शर्माला अचानक पायात दुखापत जाणवली. सुरुवातीला त्याने सामना सुरू ठेवला, मात्र सहाव्या षटकात पुन्हा त्रास वाढल्याने फिजिओने मैदानात येऊन त्याची तपासणी केली. अखेर रोहितला रिटायर हर्ट होत पॅव्हेलियनमध्ये परतावे लागले. त्यानंतर तो पुन्हा फलंदाजीला उतरला नाही.
हॅमस्ट्रिंग इजा, किती गंभीर?
मुंबई इंडियन्सच्या वतीने रोहितच्या फिटनेसबाबत कोणतीही अधिकृत माहिती देण्यात आलेली नाही. मात्र सूत्रांच्या माहितीनुसार, त्याला हॅमस्ट्रिंगचा त्रास झाला असून यामुळेच त्याला फलंदाजी सोडावी लागली. क्रिकबझच्या रिपोर्टनुसार, रोहित शर्माला आता रुग्णालयात जाऊन हॅमस्ट्रिंगचे एमआरआय स्कॅनिंग करावे लागणार आहे. या स्कॅनिंग अहवालानंतरच त्याच्या दुखापतीची नेमकी गंभीरता समजेल आणि पुढील सामन्यांबाबत निर्णय घेतला जाईल.
हे सुद्धा वाचा
IPL 2026 : चेन्नई विरुद्ध कोलकाता – दोन्ही संघांसाठी निर्णायक लढत.
मुंबई इंडियन्ससमोर आव्हान
आयपीएल २०२६ मध्ये मुंबई इंडियन्सकडे रोहित शर्मा, सूर्यकुमार यादव, हार्दिक पांड्या, जसप्रीत बुमराह, तिलक वर्मा यासारखे दिग्गज खेळाडू आहेत. अशा बलाढ्य संघाने सलग तीन सामने गमावल्याने संघाची घडी विस्कटल्याचे चित्र आहे. त्यातच रोहित शर्माच्या दुखापतीमुळे मुंबईचे टेन्शन अधिकच वाढले आहे.
पुढील सामना पंजाब किंग्सविरुद्ध वानखेडे स्टेडियमवर होणार आहे. हा सामना मुंबईसाठी अत्यंत महत्त्वाचा ठरणार आहे. मात्र रोहितच्या अनुपलब्धतेमुळे संघाची फलंदाजी कमजोर होऊ शकते. तसेच जसप्रीत बुमराहलाही अद्याप या स्पर्धेत यशस्वी विकेट मिळालेली नाही, यामुळे गोलंदाजी विभागही डगमगलेला दिसत आहे.
रोहित शर्माच्या स्कॅनिंग अहवालावरून त्याला पंजाब किंग्सविरुद्धच्या सामन्यात खेळता येईल का, हे स्पष्ट होईल. जर ही दुखापत गंभीर ठरली, तर रोहितला काही सामने वगळावे लागू शकतात. मुंबई इंडियन्सला विजयी ट्रॅकवर परतण्यासाठी आता प्रत्येक सामना जिंकणे भाग आहे. अशा परिस्थितीत रोहित सारखा अनुभवी खेळाडू बाहेर पडल्यास संघावरील दबाव आणखी वाढेल.
