आयपीएल २०२६ च्या रंगतदार हंगामात काल (२८ एप्रिल) राजस्थान रॉयल्स आणि पंजाब किंग्स यांच्यात झालेल्या लढतीत राजस्थानने ६ विकेट्सनी दणदणीत विजय मिळवला. पंजाब किंग्सचा या हंगामातील हा पहिलाच पराभव ठरला. पण या सामन्यानंतर चर्चा आहे ती राजस्थानचा तरुण कर्णधार रियान परागच्या एका वादग्रस्त व्हिडीओची. सोशल मीडियावर व्हायरल होत असलेल्या या व्हिडीओत रियान ड्रेसिंग रूममध्ये ई-सिगारेटचा वापर (व्हेपिंग) करताना दिसून येत आहे.
कालच्या सामन्यात राजस्थान रॉयल्सने प्रथम फलंदाजी करताना पंजाब किंग्ससमोर १८५ धावांचे लक्ष्य ठेवले होते. पंजाबचा आव्हानात्मक पाठलाग राजस्थानच्या गोलंदाजांनी रोखला. राजस्थानकडून डोनोव्हान फरेराने फक्त २६ चेंडूत ५२ धावांची झुंजार खेळी करत संघाला विजयाची दिशा दाखवली. या अप्रतिम कामगिरीबद्दल त्याला सामनावीर म्हणून गौरविण्यात आले.
मात्र, सामना संपल्यानंतर सोशल मीडियावर सुरू झालेल्या वादामुळे या विजयाची चर्चा कुठेतरी मागे पडली आहे.
काय आहे रियान परागच्या व्हेपिंगचं प्रकरण?
राजस्थान रॉयल्सच्या डावाच्या १६ व्या षटकादरम्यान स्टेडियमवरील कॅमेऱ्यांनी ड्रेसिंग रूमची लाईव्ह फुटेज दाखवली. याच दृश्यात ध्रुव जुरेल आणि यशस्वी जैस्वाल यांच्या उपस्थितीत रियान पराग ई-सिगारेटचा वापर करताना दिसला. हा व्हिडीओ प्रक्षेपण झाल्यानंतर क्षणार्धात सोशल मीडियावर शेअर होऊ लागला.
भारतातील ‘इलेक्ट्रॉनिक सिगारेट प्रतिबंधक कायदा’ (PECA), २०१९ नुसार व्हेपिंग उत्पादनांचे उत्पादन, विक्री आणि वापर पूर्णपणे बेकायदेशीर आहे. या कायद्याचे उल्लंघन केल्यास मोठा दंड तर आहेच, शिवाय तुरुंगवासाचीही तरतूद आहे. स्टेडियम परिसर आणि ड्रेसिंग रूममध्येही धूम्रपान करण्यास सक्त मनाई असताना ही घटना घडली आहे.
बीसीसीआयकडून कठोर कारवाईचे संकेत?
बीसीसीआयने या प्रकरणाची दखल अत्यंत गांभीर्याने घेतली आहे. क्रीडा क्षेत्रातील तज्ज्ञांच्या मते, एखाद्या खेळाडूने अशा प्रकारचे नियमभंग करणे ही केवळ वैयक्तिक चूक नसून सुरक्षा प्रोटोकॉलची गंभीर पायमल्ली आहे. व्हेपिंगमध्ये वापरल्या जाणाऱ्या रासायनिक पदार्थांची नेमकी रचना अनेकदा अस्पष्ट असल्याने ती आरोग्याच्या दृष्टीनेही धोकादायक ठरू शकते.
उल्लेखनीय म्हणजे, राजस्थान रॉयल्ससाठी या हंगामातील हा दुसरा मोठा वाद आहे. यापूर्वी संघाच्या व्यवस्थापकाला डगआउटमध्ये मोबाईल फोन वापरल्याप्रकरणी बीसीसीआयकडून ताकीद व दंड ठोठावण्यात आला होता.
हे पण वाचा
निकालापूर्वीच कर्डिलेंच्या अभिनंदनाचे झळकले फ्लेक्स…. वाचा सविस्तर……
मसाजोग सरपंच निवडणुकीचा निकाल: संतोष देशमुख यांच्या पत्नीचा पराभव, स्वरूपानंद देशमुख विजयी
सोशल मीडियावर काय दावे केले जात आहेत?
रियान परागचा व्हेपिंग व्हिडीओ व्हायरल झाल्यानंतर सोशल मीडियावर अनेक दावे जोर धरू लागले आहेत. चाहत्यांमध्ये अशी चर्चा आहे की, बीसीसीआय रियानला दोन ते तीन सामन्यांची बंदी घालू शकते. तसेच, रियानवर कारवाई झाल्यास राजस्थान रॉयल्सची कमान यशस्वी जैस्वालकडे सोपवली जाऊ शकते, अशी शक्यताही व्यक्त केली जात आहे.
तथापि, अद्याप बीसीसीआयकडून या प्रकरणी कोणतीही अधिकृत भूमिका किंवा कारवाईपुढाकार घेण्यात आलेला नाही. क्रीडाप्रेमी आणि तज्ज्ञ आता बीसीसीआयच्या निर्णयाकडे उत्सुकतेने पाहत आहेत. हा प्रकरण आयपीएलच्या अनुशासनात्मक नियमांवर नवा मोठा प्रश्नचिन्ह उभे करणार आहे का? याचे उत्तर येत्या काही दिवसांत मिळेल.
