अमरावती जिल्ह्यातील परतवाडा शहरात एका युवकाने तब्बल 180 तरुणींचे लैंगिक शोषण केल्याची धक्कादायक घटना उघडकीस आली आहे. आरोपीने तरुणींना प्रेमाच्या जाळ्यात ओढून फसवले, त्यांचे अश्लील व्हिडिओ बनवून ब्लॅकमेल केले आणि सोशल मीडियावर व्हायरल केल्याचा गंभीर आरोप आहे. भाजपचे खासदार अनिल बोंडे यांनी ही माहिती देताच राज्यभर खळबळ उडाली आहे. पोलिसांनी आरोपी मोहम्मद अयाज मोहम्मद तनवीर याला अटक केली असून, आता या प्रकरणात आणखी एक मोठा ट्विस्ट समोर आला आहे. आरोपी एमआयएम (MIM) पक्षाचा पदाधिकारी असल्याचा दावा केला जात आहे.
प्रकरण काय?
परतवाडा शहरातील मोहम्मद अयाज तनवीर या तरुणाने विविध सोशल मीडिया प्लॅटफॉर्मद्वारे तरुणींशी मैत्री केली. नाते जुळवून घेतल्यानंतर त्याने अनेकांशी शारीरिक संबंध ठेवले आणि गुप्तपणे अश्लील व्हिडिओ रेकॉर्ड केले. नंतर याच व्हिडिओच्या जोरावर त्याने पीडितांना ब्लॅकमेल करून पुन्हा पुन्हा शोषण केल्याचा आरोप आहे.
बोंडे यांच्या म्हणण्यानुसार, या युवकाने सुमारे 180 तरुणींचा लैंगिक छळ केला असून, 350 हून अधिक अश्लील व्हिडिओ व्हायरल केले आहेत. ही माहिती समोर आल्यानंतर परिसरातील पालक आणि नागरिकांमध्ये प्रचंड संताप पसरला आहे.
आरोपीवर गुन्हा दाखल, पोलिसांकडून तपास सुरू
या प्रकरणी पोलिसांनी मोहम्मद अयाज तनवीर याच्यावर गुन्हा दाखल करून त्याला ताब्यात घेतले आहे. त्याचा मोबाईल जप्त करण्यात आला असून, त्यात अनेक धक्कादायक व्हिडिओ आढळून आल्याची माहिती सूत्रांनी दिली आहे. तसेच, हे व्हिडिओ त्याने आपल्या मित्रांनाही पाठवले का, याचाही तपास सुरू आहे. पोलिस निरीक्षक सुरेश मस्के यांनी पीडित महिलांना पुढे येण्याचे आवाहन केले आहे.
पोलिसांचे आवाहन:
“भीती बाळगू नका. तुमची ओळख गुप्त ठेवली जाईल. पालकांनीही पुढाकार घ्यावा. प्रकरणात अन्य आरोपी असल्यास त्यांच्यावरही कारवाई केली जाईल,” असे मस्के यांनी स्पष्ट केले.
राजकीय ट्विस्ट: आरोपी MIM चा पदाधिकारी?
या गंभीर प्रकरणात आता राजकीय रंग चढू लागला आहे. आरोपी मोहम्मद अयाज तनवीर हा MIM (ऑल इंडिया मजलिस-ए-इत्तेहादुल मुस्लिमीन) पक्षाचा पदाधिकारी असल्याचा दावा केला जात आहे. समोर आलेल्या व्हिडिओ आणि फोटोंमध्ये तो MIMचे शहराध्यक्ष हाजी इरफान खान यांच्याकडून नियुक्तीपत्र स्वीकारताना दिसतो.
याशिवाय, गेल्या महापालिका निवडणुकीदरम्यान बडनेरा येथे झालेल्या असदुद्दीन ओवैसी यांच्या सभेच्या व्यासपीठावरही अयाज उपस्थित होता. त्याने तेथे रील्स शूट करून इंस्टाग्रामवर पोस्ट केल्या होत्या. सध्या त्या व्हिडिओ डिलीट करण्यात आल्याचे समोर आले आहे.
हे पण वाचा
mumbai drugs news : १३ हजार रुपये भाड्याच्या खोलीतून चालवले जात होते, ३० कोटींचे ड्रग्सचे साम्राज्य
आरोपीच्या मोबाईलमध्ये 7-8 तरुणींचे फोटो व व्हिडिओ
पोलिस तपासात आरोपीच्या मोबाईलमध्ये सात ते आठ वेगवेगळ्या तरुणींसोबत त्याचे फोटो आणि व्हिडिओ असल्याचे उघडकीस आले आहे. हे व्हिडिओ आरोपीने स्वतः व्हायरल केले की त्याच्या साथीदाराने, हे सायबर तपासातून स्पष्ट होईल. पोलिसांनी पीडितांसाठी हेल्पलाइन क्रमांकही उपलब्ध करून दिला आहे.
सध्या पोलिस या प्रकरणाचा तपास करत आहेत. आरोपी अयाज तनवीरवर लैंगिक शोषण, ब्लॅकमेलिंग, अश्लील व्हिडिओ व्हायरल करणे या गंभीर कलमांतर्गत कारवाई करण्यात येत आहे. याप्रकरणी आणखी कोणी सहआरोपी आहेत का, याचाही शोध घेतला जात आहे.
या घटनेने अमरावतीसह संपूर्ण महाराष्ट्रात एकच खळबळ उडाली आहे. पीडितांनी पुढे येण्याची वेळ आली असून, पालकांनी आपल्या मुलींच्या सुरक्षिततेबाबत जागरूकता वाढविण्याची गरज आहे.
