नाशिकमधील या धक्कादायक प्रकरणाने कॉर्पोरेट जगतातील महिलांच्या सुरक्षिततेचा प्रश्न पुन्हा एकदा पुढे आला आहे. या प्रकरणी एकापाठोपाठ एक नवे अपडेट समोर येत असताना, आता सरकार थेट कारवाई करणार आहे.
कामगार मंत्र्यांचे कडक निर्देश
राज्याचे कामगार मंत्री आकाश फुंडकर यांनी नुकतेच महत्त्वाचे निर्देश दिले आहेत. या नवीन निर्देशांनुसार, कोणत्याही कॉर्पोरेट कंपनीत कर्मचाऱ्यांवर दबाव आणणे, गैरवर्तन करणे अथवा कोणत्याही प्रकारचा अत्याचार सहन केला जाणार नाही. कंपन्यांनी याबाबत कठोर पावले उचलणे बंधनकारक असणार आहे.
महिलांसाठी विशेष अभ्यास गट
या पार्श्वभूमीवर कामगार मंत्र्यांनी महिला कर्मचाऱ्यांच्या हितासाठी एक विशेष अभ्यास गट स्थापन करण्याच्या सूचना दिल्या आहेत. हा अभ्यास गट सीआयएस (कॉम्प्लेन्ट इन्फॉर्मेशन सिस्टीम) प्रणालीचा वापर करून महिलांच्या अडचणी, तक्रारी आणि समस्या नोंदवण्याचे काम करेल. या प्रणालीद्वारे प्रत्येक तक्रारीचा तपास करून त्यावर तातडीने उपाययोजना केली जाईल, असेही मंत्र्यांनी स्पष्ट केले.
सर्व आयटी कंपन्यांवर करडी नजर
सरकारने आता राज्यातील सर्व आयटी कंपन्यांवर करडी नजर ठेवण्याचा निर्णय घेतला आहे. नाशिकमधील घटनेनंतर इतर कंपन्यांमध्येही तपासणी मोहीम राबविण्याची शक्यता आहे. कामगार विभागाकडून लवकरात लवकर ठोस उपाययोजना करण्याचे निर्देश देण्यात आले आहेत.
हे सुद्धा वाचा
राहुरी विधानसभा पोट निवडणुकीसाठी प्रशासन सज्ज, कर्मचाऱ्याना केंद्रावरच मिळणार मतदान साहित्य.
कल्पना खरात यांच्या ७ कोटींच्या बँक व्यवहारावर कोर्टातच उपस्थित झाला सवाल!
महिला सबलीकरणासाठी कॉंग्रेस पक्ष आणि विरोधी पक्ष पूर्णपणे कटिबद्ध….वाचा सविस्तर
पोलिस प्रशासनही सतर्क
नाशिक शहरातील या नामांकित मल्टिनॅशनल आयटी कंपनीत महिला कर्मचाऱ्यांवर झालेल्या अत्याचार आणि धर्मांतराच्या प्रयत्नांचे गंभीर प्रकार समोर आल्यानंतर पोलिस प्रशासनही अलर्ट मोडवर आले आहे. संबंधित कंपनीविरोधात गुन्हा दाखल करण्यात आला असून अधिक तपास सुरू आहे.
नाशिक आयटी कंपनी प्रकरणाने कॉर्पोरेट क्षेत्रातील महिलांच्या सुरक्षिततेच्या प्रश्नाला वाचा फोडली आहे. कामगार मंत्री आकाश फुंडकर यांच्या कठोर निर्देशांनंतर आता सरकारची कारवाई आणखी कठोर होणार आहे. महिला कर्मचाऱ्यांसाठी विशेष अभ्यास गट आणि सीआयएस प्रणालीमुळे तक्रार नोंदवणे सुलभ होईल, अशी अपेक्षा आहे. पुढील काळात सरकार कोणती पावले उचलते, याकडे सर्वांचे लक्ष लागून राहिले आहे.
