भारतीय जनता पक्ष आपल्या संघटनात्मक पातळीवर एक मोठा बदल करत आहे. पक्षाचे राष्ट्रीय अध्यक्ष नितीन नबीन यांच्या अध्यक्षतेखाली अलीकडेच दिल्लीतील पक्ष मुख्यालयात देशभरातील अडीचशे प्रमुख पदाधिकाऱ्यांची बैठक पार पडली. या बैठकीत या महाअभियानाच्या रुपरेषेवर चर्चा करण्यात आली. यावेळी राष्ट्रीय संघटन सरचिटणीस बी. एल. संतोष आणि सहसंघटन मंत्री शिवप्रकाश यांनीही मार्गदर्शन केले.
‘प्रशिक्षण वर्ष’ म्हणून जाहीर
केंद्रीय भाजपने हे वर्ष ‘प्रशिक्षण वर्ष’ म्हणून जाहीर केले आहे. पक्षातील प्रत्येक पदाधिकारी, सामान्य कार्यकर्ता तसेच पक्षात नव्याने आलेल्या नेत्यांनाही हे प्रशिक्षण अनिवार्य असेल. ‘नेतेगिरी करण्याआधी कार्यकर्ता बना’ हा या प्रशिक्षणाचा मुख्य गाभा आहे. पुढील पाच ते पंचवीस वर्षांसाठी वैचारिकदृष्ट्या सक्षम कार्यकर्त्यांची फळी उभी करणे हे या अभियानाचे प्रमुख ध्येय आहे.
डिजिटल प्लॅटफॉर्मद्वारे प्रशिक्षण
या मोठ्या उद्दिष्टासाठी भाजपने डिजिटल प्रशिक्षण प्लॅटफॉर्म तयार केला आहे. या प्लॅटफॉर्मवरून कार्यकर्त्यांना भाजपपूर्वीचे जनसंघ, त्याचा प्रवास, पक्षाची वैचारिक बैठक, कार्यकर्त्यांच्या अपेक्षा, पक्षशिस्त आणि थोर नेत्यांची माहिती देण्यात येणार आहे. कार्यकर्ते घरबसल्या या माहितीचा अभ्यास करून ऑनलाइन प्रश्नांची उत्तरे देतील. याद्वारेच त्यांचे प्रशिक्षण पूर्ण होईल. असा उपक्रम राबवणारा भाजप देशातील पहिलाच राजकीय पक्ष ठरेल.
हे पण वाचा
पार्सल उशिरा दिल्याच्या रागातून तलवारीने हल्ला, दोन जखमी रोकड लुटून आरोपी फरार
गोंदेगावात अल्पवयीन मुलाच्या धर्मांतराचा प्रयत्न
भाजपची सध्याची सदस्यसंख्या
भाजपचे देशभरात १४ कोटी ५८ लाख प्राथमिक सदस्य आहेत. त्यापैकी साडेतीन कोटी सदस्यांवर पक्षाची काही ना काही जबाबदारी आहे. या साडेतीन कोटी सदस्यांना पक्षाची विस्तृत माहिती व्हावी, यासाठी हा डिजिटल प्रशिक्षण प्लॅटफॉर्म विकसित करण्यात आला आहे.
राज्यात प्रशिक्षण शिबिरांना सुरुवात
राष्ट्रीय पातळीवरच्या या उपक्रमाची महाराष्ट्रात सुरुवात २० फेब्रुवारीपासून झाली आहे. या महाअभियानाचे राष्ट्रीय संयोजक म्हणून शिवप्रकाश यांच्यावर जबाबदारी सोपवण्यात आली आहे. पश्चिम विभागासाठी (गोवा, गुजरात, महाराष्ट्र, मध्य प्रदेश व छत्तीसगड) गुजरातचे माजी खासदार के.सी. पटेल यांची प्रभारी म्हणून नियुक्ती करण्यात आली आहे. देशभरात भाजपची निवासी प्रशिक्षण शिबिरेही सुरू आहेत.
शिस्त आणि विचारधारेवर भर
या प्रशिक्षण अभियानात शिस्त आणि विचारधारा यावर विशेष भर देण्यात येत आहे. ‘व्यक्ती निर्माणातून संघटन निर्माण आणि संघटन निर्माणातून राष्ट्रनिर्माण’ ही या प्रशिक्षणाची मध्यवर्ती संकल्पना आहे. कार्यकर्त्यांनी आधी भाजपचा विचार समजून घेऊन तो आचरणात आणावा, अशी अपेक्षा पक्ष नेतृत्वाने व्यक्त केली आहे.
