भोंदूबाबांच्या सहकाऱ्याचा दुर्घटनेत मृत्यू

नाशिकमधील तथाकथित भोंदूबाबा अशोक खरात यांच्या जवळच्या सहकाऱ्याचा समृद्धी महामार्गावर झालेल्या भीषण अपघातात मृत्यू झाल्याची धक्कादायक घटना समोर आली आहे. शिवनिका ट्रस्टचे उपाध्यक्ष जितेंद्र शेळके आणि त्यांच्या पत्नीचा या अपघातात जागीच मृत्यू झाला, तर त्यांचा मुलगा गंभीर जखमी झाला आहे. या प्रकरणी पोलिसांनी घातपाताची शंका व्यक्त करत कंटेनर चालकाला चौकशीसाठी ताब्यात घेतले आहे.

कशी घडली अपघाताची संपूर्ण घटना?

शुक्रवारी दुपारच्या सुमारास ही दुर्घटना घडली. जितेंद्र शेळके हे संभाजीनगरहून शिर्डीकडे जात होते. धोत्रे गावाजवळ समृद्धी महामार्गावर त्यांच्या वेगातील कारने रस्त्याच्या कडेला हळूहळू जाणाऱ्या कंटेनरला मागून जोरदार धडक दिली. धडक इतकी भीषण होती की कार कंटेनरखाली घुसली. या दुर्घटनेत जितेंद्र शेळके आणि त्यांच्या पत्नीचा मृत्यू झाला असून त्यांचा मुलगा गंभीर जखमी झाल्याचे वृत्त आहे.

घातपाताची शंका, पोलिसांकडून कसून तपास

या अपघातामागे घातपात असल्याची शंका व्यक्त करण्यात येत असल्याने पोलिसांनी गांभीर्याने तपास सुरू केला आहे. शनिवारी कोपरगाव तालुका पोलीस ठाण्यात कंटेनर चालकाला चौकशीसाठी बोलावण्यात आले होते. पोलिसांनी या प्रकरणी अकस्मात मृत्यूची नोंद केली असली तरी, राजकीयदृष्ट्या या घटनेला महत्त्व असल्याने सखोल चौकशी करण्यात येत आहे.

हे पण वाचा 

गर्भपाताच्या गोळ्याच्या अति सेवनाने तरुणीचा मृत्यू… वाचा सविस्तर

१३१ वे घटनादुरुस्ती विधेयक नापास; आता रात्री ८.३० वाजता मोदी काय सांगणार?

कंटेनर चालकाचे पोलिसांना काय स्पष्टीकरण?

अपघातात सामील कंटेनर उत्तर प्रदेशमधील अमेठी येथील जमाल वारिस हा चालक चालवत होता. पोलिसांना दिलेल्या जबाबात त्याने म्हटले की, तो हैदराबादहून अहमदाबादकडे जात होता. शुक्रवारी दुपारी 12 वाजता कंटेनरच्या रेडिएटरचा पाईप गळती झाल्याने गाडी गरम झाली होती. त्यामुळे त्याने कंटेनर हळू वेगात रस्त्याच्या कडेने चालवला होता. त्याने गाडी थांबवली नव्हती, फक्त वेग कमी केला होता.

जमालने पुढे सांगितले की, अचानक मागून जोरदार आवाज आला. आरशात काही दिसल्यानंतरही त्याला तातडीने काही कळाले नाही. मात्र, जेव्हा तो खाली उतरून पाहायला गेला, तेव्हा कार त्याच्या कंटेनरला धडकलेली दिसली.

सध्या पोलिसांनी कंटेनर चालकाची कसून चौकशी सुरू केली आहे. या चौकशीतून नवीन माहिती समोर येईल की प्रकरण निव्वळ अपघाताचे आहे, याबाबत साशंकता कायम आहे. जितेंद्र शेळके हे नाशिकमधील एका विवादित भोंदूबाबाच्या अत्यंत निकटवर्तीय असल्याने राजकीय आणि सामाजिक वर्तुळात या घटनेने खळबळ उडवून दिली आहे. पोलिसांच्या पुढील तपासाकडे सर्वांचे लक्ष लागून राहिले आहे.