अहिल्यानगरमध्ये मोठी कारवाई; अंधश्रद्धा निर्मूलन समितीच्या तक्रारीला यश
अहिल्यानगर जिल्ह्यातील संगमनेर पोलिसांनी एक महत्त्वपूर्ण कारवाई करताना मंत्रोच्चार आणि दैवी शक्तीच्या नावाखाली लोकांची फसवणूक करणाऱ्या भोंदू राजेंद्र गडगेच्या मुसक्या आळवल्या आहेत. पोलिसांनी त्याचा ‘दत्तधाम दरबार’ सील करून आश्रमात तासन्तास झाडाझडती केली.
पोलिसांसमोरच भोंदूचे छातीठोक आव्हान
अटकेनंतर राजेंद्र गडगेला चौकशीसाठी वडगावपान येथील दत्तधाम दरबारात नेण्यात आले. तेथे त्याने पोलिसांसमोरच थेट अंनिसला आव्हान देत ‘मला अडकविण्याचा कट’ असल्याचा आरोप केला. ‘मी लोकांची सेवा करतो. माझ्याकडे दैवी शक्ती आहे. मी मंत्र-तंत्राचा बाप आहे. कारण मी आत्मज्ञानी आहे,’ अशी विधाने करत त्याने आपली बाजू मांडली. पोलिसांनी बोलणे थांबवल्यानंतरही ‘पोलीस माझा छळ करत आहेत,’ असे आरोप त्याने केले.
दरबारातून औषधांचे नमुने ताब्यात
संगमनेर पोलिसांनी गडगेच्या आश्रमाची चार तास झाडाझडती घेत स्पॉट पंचनामा केला. दरबारातील विविध औषधांचे नमुनेही ताब्यात घेण्यात आले आहेत. सध्या आरोपीला पाच दिवसांची पोलीस कोठडी देण्यात आली असून, त्याची कसून चौकशी सुरू आहे.
हे पण वाचा
शिवनिका ट्रस्टचे संचालक जितेंद्र शेळके यांचा अपघाती मृत्यू….पत्नीही ठार.. वाचा सविस्तर…
नेमके प्रकरण काय?
राजेंद्र बापू गडगेने वडगावपान परिसरात स्वतःला दैवी शक्ती प्राप्त असल्याचे भासवून ‘दत्तधाम सरकार’ नावाचे YouTube चॅनेल सुरू केले होते. या माध्यमातून तो कर्करोगासारखे गंभीर आजार मंत्रशक्तीने बरे करण्याचे, निपुत्रिक महिलांना मूल प्राप्त करून देण्याचे तसेच घरातील विविध समस्या दूर करण्याचे खोटे दावे करत असे. या आमिषाला बळी पडून अनेक नागरिक त्याच्या दरबारात हजेरी लावत होते.
अंधश्रद्धा निर्मूलन समितीच्या तक्रारीनंतर ही कारवाई करण्यात आली आहे. भोंदू राजेंद्र गडगेविरुद्ध दाखल गुन्ह्याचा तपास पोलीस सध्या करत आहेत.
Comments 1