पंजाबकडे 11 गुण, केली अनोखी कामगिरी
रविवारी (19 एप्रिल) मैदानावर झालेल्या रंगतदार लढतीत पंजाब किंग्सने लखनौ सुपर जायंट्सवर दणदणीत विजय मिळवला. लखनौसमोर 255 धावांचे मोठे आव्हान होते, मात्र त्यांचा संघ केवळ 200 धावांपर्यंतच पोहोचू शकला. या यशासह पंजाबने आयपीएल 2026 मध्ये आपला पाचवा विजय नोंदविला.
सर्वात महत्त्वाचे म्हणजे, पंजाब किंग्स या मोसमात सहा सामने खेळूनही एकही सामना न गमावणारी स्पर्धेच्या इतिहासातील पहिला संघ ठरला. केकेआरविरुद्धचा सामना पावसामुळे रद्द झाल्याने दोन्ही संघांना प्रत्येकी एक गुण मिळाला. त्यामुळे पंजाबच्या खात्यात 11 गुण जमा झाले असून ते 19 व्या मोसमातील 29 सामन्यांनंतरही गुणतक्त्यात अव्वल स्थानी कायम आहेत.
नेट रनरेटमध्येही झेप
पंजाबचा नेट रनरेट विजयापूर्वी +1.067 होता, तो आता वाढून +1.420 इतका झाला आहे. यामुळे त्यांची स्थिती आणखी मजबूत झाली आहे.
रविवारच्या डबल हेडरने बदलले समीकरण
रविवारी झालेल्या डबल हेडरमधील पहिल्या सामन्यात कोलकाता नाईट रायडर्सने राजस्थान रॉयल्सचा पराभव केला. अजिंक्य रहाणेच्या नेतृत्वाखाली केकेआरने मोहिमेतील सातव्या सामन्यात पहिला विजय मिळवत आपले खाते उघडले. या विजयामुळे गुणतक्त्यात मोठी उलथापालथ झाली.
राजस्थानचा सलग दुसरा पराभव
रियान परागच्या नेतृत्वातील राजस्थान रॉयल्सने यापूर्वी सलग चार सामने जिंकले होते, मात्र आता त्यांना सलग दुसऱ्या पराभवाचा सामना करावा लागला. केकेआरविरुद्धचा पराभव त्यांच्यासाठी मोठा धक्का ठरला.
हे पण वाचा
शिवनिका ट्रस्टचे संचालक जितेंद्र शेळके यांचा अपघाती मृत्यू….पत्नीही ठार.. वाचा सविस्तर…
गुणतक्त्यात कुठे कोण किती?
पंजाब किंग्सच्या अव्वल स्थानासाठी इतर संघांच्या अपयशानेही मदत केली. शनिवारी (18 एप्रिल) रॉयल चॅलेंजर्स बंगळुरूला दिल्ली कॅपिटल्सकडून पराभव पत्करावा लागला. तर रविवारी राजस्थानचा पराभव होताच, बंगळुरू आणि राजस्थान दोघांच्याही खात्यात सहा सामन्यांनंतर प्रत्येकी 8 गुण आहेत. गुणतक्त्यात ते अनुक्रमे दुसऱ्या आणि तिसऱ्या स्थानी आहेत.
केकेआरची झेप, मुंबईची घसरण
केकेआरने राजस्थानवर 4 विकेट्सने मिळवलेल्या विजयामुळे एका स्थानाची झेप घेतली. केकेआर आता नवव्या स्थानी पोहोचली आहे. याउलट, यापूर्वी नवव्या स्थानी असलेल्या मुंबई इंडियन्सची सर्वात शेवटी म्हणजे दहाव्या स्थानी घसरण झाली आहे.
आयपीएल 2026 अधिकच रंगतदार होत असून प्रत्येक सामन्याने गुणतक्त्यात बदल होत आहेत. पंजाब किंग्सची ही अभूतपूर्व कामगिरी किती दिवस टिकते, हे पाहणे औत्सुक्याचे ठरेल. तर मुंबईसारखी बलाढ्य संघाला सलग पराभवातून बाहेर येण्यासाठी कठोर परिश्रम करावे लागणार आहेत.
