राष्ट्रवादीत उमेदवारीसाठी रस्सीखेच,

महाराष्ट्र विधान परिषद निवडणुकीच्या पार्श्वभूमीवर राष्ट्रवादी काँग्रेस पक्षाने जोरदार तयारी सुरू केली आहे. काल (मंगळवारी, २८ एप्रिल) रात्री उशिरापर्यंत देवगिरी निवासस्थानी पक्षाच्या वरिष्ठ नेत्यांची महत्त्वाची बैठक पार पडली. या बैठकीत एकमेव विधान परिषदेच्या जागेसाठी संभाव्य उमेदवारांच्या नावांवर सखोल चर्चा झाली. पक्षात अनेक दावेदार असल्याने उमेदवार निश्चित करण्यासाठी अजून एक बैठक आज (बुधवारी) होणार असून, त्यात अंतिम नावावर शिक्कामोर्तब होण्याची शक्यता आहे.

रात्री उशिरा देवगिरीवर बैठक – कोण होते उपस्थित?

मंगळवारी रात्री ११ ते २ या वेळेत राष्ट्रवादी काँग्रेसच्या राष्ट्रीय अध्यक्षा सुनेत्रा पवार, खासदार पार्थ पवार, राष्ट्रीय कार्याध्यक्ष प्रफुल पटेल आणि प्रदेशाध्यक्ष सुनील तटकरे यांच्या उपस्थितीत ही बैठक झाली. यावेळी माजी खासदार संजय काकडे यांचे चिरंजीव विक्रम काकडे देखील सहभागी झाले होते. विक्रम हे खासदार पार्थ पवार यांचे बालमित्र असून, त्यांच्या नावाची चर्चा असली तरी पक्षाच्या एका गटाकडून त्यांना जोरदार विरोध होत असल्याचे समोर आले आहे.

उमेदवारीच्या शर्यतीत ही नावे आघाडीवर

मिळालेल्या माहितीनुसार, बैठकीत राजेंद्र जैन, सुरेश बिराजदार, उमेश पाटील आणि झिशान सिद्धकी यांच्याबाबतही तपशीलवार चर्चा झाली.

• राजेंद्र जैन – पक्षाचे माजी विधान परिषद सदस्य आणि राष्ट्रीय कार्याध्यक्ष प्रफुल पटेल यांचे निकटवर्तीय.

• झिशान सिद्धकी – पक्षाचे महत्त्वाचे नेते; विधानसभा निवडणुकीत त्यांचा पराभव झाला होता.

• सुरेश बिराजदार व उमेश पाटील – या दोघांचीही नावे संभाव्य उमेदवार म्हणून चर्चेत आहेत.

विक्रम काकडे यांच्या उमेदवारीला बळकट विरोध असल्याने पक्षाला पर्यायी नावे शोधावी लागत आहेत. देवगिरीवर रात्री उशिरा झालेल्या चर्चेनंतर लगेचच पुन्हा बैठक बोलावण्यात आली असल्याचे समोर आले आहे.

आज कोअर कमिटीची बैठक – अंतिम शिक्कामोर्तबाची शक्यता

बुधवारी (२९ एप्रिल) देवगिरी निवासस्थानी राष्ट्रवादीच्या कोअर कमिटीची बैठक होत आहे. या बैठकीसाठी माजी मंत्री दिलीप वळसे-पाटील, हसन मुश्रीफ, धनंजय मुंडे आणि प्रदेशाध्यक्ष सुनील तटकरे हे आधीच पोहोचले आहेत. अपेक्षित आहे की, आजच्या बैठकीत उमेदवाराच्या नावावर अंतिम शिक्कामोर्तब केले जाईल. पक्षातील एक गट विक्रम काकडे यांना पसंती देत असला तरी इतर गटांकडून विरोध असल्याने अंतिम निर्णय सर्वमान्य होईल की नव्या चर्चांना वाव मिळेल, हे पाहणे महत्त्वाचे ठरणार आहे.

हे पण वाचा

निकालापूर्वीच कार्दीलेंच्या अभिनंदनाचे झळकले फ्लेक्स…. वाचा सविस्तर……

दक्षिण भारतात बुलेट ट्रेनचा विस्तार…

एका जागेसाठी रस्सीखेच

विधानसभेतील सध्याच्या संख्याबळानुसार विधान परिषदेच्या निवडणुकीत भाजपच्या वाट्याला ६, शिवसेनेला २, राष्ट्रवादीला १ आणि महाविकास आघाडीला १ अशा जागा येणार आहेत. त्यामुळे राष्ट्रवादी काँग्रेससाठी ही एकमेव जागा अत्यंत प्रतिष्ठेची ठरते. यासाठी पक्षातील विविध गटांमध्ये रस्सीखेच सुरू असून, उमेदवार निवडीचा अंतिम निर्णय पक्षश्रेष्ठींना अवघड झाला आहे.