pune crime news : भाजपच्या विधी शाखा अध्यक्षासह पत्नी-अल्पवयीन मुलीला अटक; सेक्रेटरीचा खून, प्रकरणात अनैतिक संबंधांचा संशय

सेक्रेटरीच्या खूनप्रकरणी भाजपच्या विधी शाखा अध्यक्षासह पत्नी व मुलीला अटक

pune crime : पुणे शहरातून एक खळबळजनक बातमी समोर आली आहे. भारतीय जनता पक्षाच्या (भाजप) पुण्यातील विधी शाखेचे अध्यक्ष आणि वकील असलेले संजय सावंत यांना त्यांच्या कार्यालयातील महिला सेक्रेटरीचा खून केल्याप्रकरणी पोलिसांनी अटक केली आहे. या गंभीर घटनेमध्ये सावंत यांच्या पत्नी आणि अल्पवयीन मुलीचाही सहभाग असल्याचे उघडकीस आले आहे. तिघांनाही पोलिसांनी ताब्यात घेतले आहे.

ही घटना पुण्यातील मुंढवा परिसरातील वकील सावंत यांच्या कार्यालयात घडली. मयत महिलेचे नाव पुनम दिनेश मुन (वय ३५) आहे. त्या सावंत यांच्याकडे सेक्रेटरी म्हणून काम करत होत्या.

नेमकं प्रकरण काय?

प्राप्त माहितीनुसार, वकील संजय सावंत यांच्याशी पुनम यांचे अनैतिक संबंध असल्याचा संशय सावंत यांच्या पत्नी स्वाती सावंत यांना होता. याच कारणावरून पुनम आणि स्वाती यांच्यात सातत्याने वाद होत होते. याच वादातून खून करण्यापर्यंतची ही घटना घडली असल्याचे प्राथमिक तपासात समोर आले आहे.

खून कसा झाला? 

गुरुवारी (१६ एप्रिल) वकील सावंत यांच्या कार्यालयात एक भीषण घटना घडली. संशयित आरोपी संजय सावंत, त्यांची पत्नी स्वाती आणि अल्पवयीन मुलीने एकत्रितपणे पुनम मुन यांना जबर मारहाण करायला सुरुवात केली.

मारहाणीदरम्यान, पुनम यांचे पाय दोरीने बांधण्यात आले. त्यानंतर त्यांना बॅटने (बेसबॉल बॅट) निर्दयपणे मारहाण करण्यात आली. या अमानुष मारहाणीत पुनम यांचा दुर्दैवी मृत्यू झाला. मृत्यू झाल्यानंतर आरोपींनी पुनम यांचा मृतदेह एका पोत्यात भरून ते पोतं कार्यालयातच एका कोपऱ्यात लपवून ठेवले. पुढील दिवशी म्हणजे शुक्रवारी या मृतदेहाची विल्हेवाट लावण्याचा आरोपींचा मनसुबा होता.

हे पण वाचा

शिवनिका ट्रस्टचे संचालक जितेंद्र शेळके यांचा अपघाती मृत्यू….पत्नीही ठार.. वाचा सविस्तर…

महाराष्ट्रात कमी पावसाचा इशारा

खुलासा कसा झाला? 

दरम्यान, पुनम या घरी न आल्याने त्यांच्या पती उद्धव मुन (दिनेश मुन) यांनी त्यांचा शोध सुरू केला. गुरुवारी रात्री उशिरापर्यंत पत्नी घरी न आल्याने उद्धव यांनी वकील सावंत यांना फोन केला असता, ‘पुनम मैत्रिणीकडे किंवा नातेवाईकांकडे गेली असेल’, असे सांगण्यात आले. मात्र, पुनमचा कुठेही पत्ता न लागल्याने कुटुंबीयांनी पोलिसांत तक्रार दाखल केली.

शुक्रवारी सकाळी उद्धव मुन हे थेट एडवोकेट संजय सावंत यांच्या कार्यालयात पोहोचले. तिथे त्यांना एक संशयास्पद पोतं पडलेलं दिसलं. त्यांनी ते पोतं उघडून पाहताच त्यात पुनम यांचा मृतदेह आढळून आला. यानंतर लगेचच या घटनेची माहिती पोलिसांना देण्यात आली.

घटनेची गांभीर्याने दखल घेत पुणे पोलिसांनी तात्काळ कारवाई करत संजय सावंत, त्यांची पत्नी स्वाती सावंत आणि अल्पवयीन मुलीला अटक केली आहे. तीनही आरोपींविरुद्ध खून, पुरावे नष्ट करणे आणि इतर संबंधित कलमांतर्गत गुन्हा दाखल करण्यात आला आहे. पुढील तपास पोलिस करत आहेत.