नाशिकमधील अशोक खरात प्रकरणाने संपूर्ण राज्याला हादरवून सोडले आहे. दरम्यान, आता मुंबईतून एक खळबळजनक घटना समोर आली आहे. उपचाराच्या नावाखाली अघोरी कृत्ये आणि जादूटोणा करून लोकांची दिशाभूल करणाऱ्या एका भोंदू बाबाला मुंबई पोलिसांनी अटक केली आहे. ही घटना मालाड पूर्व परिसरातील असून, यामुळे परिसरात दहशतीचे वातावरण निर्माण झाले होते.
कोण आहे हा भोंदू बाबा?
पोलिसांनी अटक केलेल्या या संशयिताचे नाव रिदम पांचाळ (वय ३७) असून, तो मालाड पूर्व येथे राहतो. मिळालेल्या माहितीनुसार, रिदम गेल्या दोन वर्षांपासून रविवार आणि गुरुवार या दिवशी स्वतःमध्ये देवी आल्याचा दावा करत अघोरी पूजा करायचा. भूतबाधा दूर करण्याच्या नावाखाली तो रात्री उशिरापर्यंत अघोरी विधी करत असे.
स्थानिकांमध्ये दहशत का?
हा भोंदू बाबा उपचाराच्या नावाखाली नागरिकांकडून विचित्र आणि संशयास्पद साहित्य मागवत असे. या साहित्यामध्ये बकऱ्याचे काळीज, स्मशानातील राख, लिंबू, टाचण्या, दारूची बाटली, सिगारेट, काळे आणि लाल कापड, तसेच कुंकू यांचा समावेश होता. हे सर्व साहित्य चार रस्त्यांच्या मध्यभागी ठेवण्याची सूचना तो लोकांना देत असे. अशा प्रकारे तो सामान्य नागरिकांच्या श्रद्धेचा गैरफायदा घेत होता.
सार्वजनिक ठिकाणी केला होता जादूटोण्याचा प्रयोग
विशेष म्हणजे, ४ एप्रिल रोजी या आरोपीने महापालिकेच्या बागेत अनेकांच्या उपस्थितीत खुलेआम जादूटोण्याचा प्रयोग केला होता. त्याची ही कृत्ये पाहून स्थानिक नागरिकांच्या दहशतीत वाढ झाली.
गुन्ह्याची नोंद आणि अटकेची कारवाई
रिदम पांचाळच्या अघोरी कृत्यांमुळे परिसरातील सुमारे ६५ ते ७० नागरिक त्रस्त झाले होते. या सर्व नागरिकांनी एकत्र येत, स्वाक्षऱ्या करून दिंडोशी पोलीस ठाण्यात तक्रार दाखल केली. तक्रारीसह त्यांनी अनेक फोटो आणि व्हिडीओ पुरावेही पोलिसांना दिले. स्थानिकांची मागणी होती की, या आरोपीविरोधात अंधश्रद्धा आणि जादूटोणा विरोधी कायद्यांतर्गत गुन्हा दाखल करण्यात यावा.
या तक्रारीची गंभीर दखल घेत दिंडोशी पोलिसांनी रिदम पांचाळला ताब्यात घेतले आणि त्याला अटक केली. आज दुपारी त्याला बोरिवली येथील न्यायालयात हजर करण्यात येणार आहे.
हे पण वाचा
विराट हिंदू संमेलनास महिला वर्गाने मोठ्या संखेने उपस्थित राहावे – सौ. देवयानी काळे
शिंदे शिवसेनेत गट बाजी उघड ? वाचा सविस्तर
आरोपीचे स्पष्टीकरण आणि प्रकरणाचे गांभीर्य
दरम्यान, अटकेतील या भोंदू बाबाने आपल्यावर ठेवण्यात आलेले सर्व आरोप फेटाळून लावले आहेत. तो जादूटोणा करत नसून केवळ लोकांची सेवा करतो, असे त्याचे म्हणणे आहे. तसेच या कृत्यातून त्याला कोणताही आर्थिक फायदा होत नसल्याचेही त्याने सांगितले.
परंतु हे प्रकरण अधिकच गंभीर बनवते ती म्हणजे, मुंबईसारख्या सुशिक्षित आणि प्रगत शहरातील सुशिक्षित लोकसुद्धा अशा प्रकारच्या अंधश्रद्धेला बळी पडत असल्याचे चित्र यातून पाहायला मिळाले आहे. आता दिंडोशी पोलीस या प्रकरणी पुढे कोणती कारवाई करतात, याकडे सर्वांचे लक्ष लागले आहे.
