मुंबईत कोकेनचा मोठा साठा जप्त
मुंबईमध्ये आंतरराष्ट्रीय ड्रग्ज रॅकेटवर मोठी कारवाई करताना अंमली पदार्थ नियंत्रण विभागाने (एनसीबी) 349 किलो कोकेन जप्त केले आहे. हे प्रमाण प्रचंड असून आंतरराष्ट्रीय बाजारात या ड्रग्जची किंमत सुमारे 1745 कोटी रुपये इतकी आहे.
या महत्त्वपूर्ण कारवाईची माहिती स्वत: केंद्रीय गृहमंत्री अमित शाह यांनी सोशल मीडिया प्लॅटफॉर्म एक्सवर दिली. त्यांनी या यशस्वी मोहिमेबद्दल एनसीबी टीमचे अभिनंदन केले.
अमित शाह यांनी नेमकं काय म्हटलं?
अमित शाह यांनी आपल्या एक्स पोस्टमध्ये स्पष्ट केले की, ड्रग्ज कार्टेलचा पूर्णपणे नायनाट करण्याचा केंद्र सरकारचा निर्धार आहे. त्यांनी लिहिले:
“अमली पदार्थांच्या टोळ्यांना निर्दयपणे संपवण्याचा आम्ही निश्चय केला आहे. एनसीबीने एका मोठ्या आंतरराष्ट्रीय रॅकेटवर धडक कारवाई करत मुंबईत 1745 कोटी रुपये किमतीचे 349 किलो दर्जेदार कोकेन जप्त केले आहे.”
गृहमंत्र्यांनी या कारवाईला ‘बॉटम टू टॉप’ तपासाचे उत्तम उदाहरण म्हटले आहे. या पद्धतीत अमली पदार्थांच्या छोट्या खेपेचा मागोवा घेत अखेर मोठ्या जाळ्यापर्यंत पोहोचले जाते.
‘बॉटम टू टॉप’ तपासाचे यश
एनसीबीच्या या कारवाईची सुरुवात एका छोट्या तपासाने झाली. मात्र, नियोजनबद्ध आणि वैज्ञानिक पद्धतीने केलेल्या अनुसंधानामुळे ही मोठी गुत्थी उलगडली. सूत्रांनी दिलेल्या माहितीनुसार, हे कोकेन दक्षिण अमेरिकेतील ड्रग्ज कार्टेलकडून आंतरराष्ट्रीय स्तरावर तस्करी करून आणण्यात आले होते.
अमित शाह यांनी ‘टीम एनसीबी’च्या या अभूतपूर्व यशाबद्दल मनःपूर्वक अभिनंदन केले असून, ड्रग्ज माफियांवर कठोर कारवाईची ग्वाही दिली आहे.
हे पण वाचा
मुम्मका सुदर्शन अहिल्यानगरचे नवे पोलीस अधीक्षक..
Mumbai Watermelon Death Case: डोकाडिया कुटुंबाच्या मृत्यूप्रकरणाला गंभीर वळण
महाराष्ट्रात आता ऑन-स्पॉट ड्रग टेस्टिंग सुरू
दरम्यान, ड्रग्ज प्रकरणांना आळा घालण्यासाठी महाराष्ट्र पोलिसांनीही मोठा निर्णय घेतला आहे. राज्यात पहिल्यांदाच अत्याधुनिक ड्रग्ज टेस्टिंग मशीनद्वारे ‘ऑन द स्पॉट’ तपासणी सुरू करण्यात येत आहे.
-
ही मशीन रस्त्यावरच वाहन चालक किंवा संशयित व्यक्तीने अमली पदार्थांचे सेवन केले आहे का, हे त्वरित ओळखू शकेल.
-
नागपुरात महाराष्ट्र दिन (१ मे) पासून या मशीनचा वापर सुरू करण्यात आला आहे.
-
भविष्यात राज्यातील इतर प्रमुख शहरांमध्येही ही सुविधा उपलब्ध करून दिली जाईल.
या नव्या पद्धतीमुळे रेव्ह पार्टी किंवा ड्रग्जच्या प्रभावाखाली वाहने चालविणाऱ्यांवर त्वरित कारवाई करणे शक्य होणार आहे.
