पुण्यातील डेक्कन परिसरातील गाडगीळ पूल व छत्रपती संभाजी पुलादरम्यानच्या नदीपात्रात एका तरुणाची तीक्ष्ण शस्त्राने वार करून हत्या करण्यात आली होती. या घटनेने परिसरात खळबळ उडाली होती. मात्र, आता पोलिसांनी या गुन्ह्याचा उलगडा करत आरोपीला ताब्यात घेतले आहे. हत्या पैशांच्या वादातून करण्यात आल्याचे तपासात उघड झाले आहे.
हत्याकांडामागचे कारण समोर
मिळालेल्या माहितीनुसार, १९ एप्रिल रोजी सकाळी साडेसातच्या सुमारास डेक्कन येथील नदीपात्रातील मोकळ्या जागेत एक व्यक्तीचा मृतदेह आढळून आला होता. मृताचे नाव कृषल कसबे (वय ३३, रा. महात्मा फुले पेठ) असून त्यांच्या गळ्यावर शस्त्राने गंभीर वार केल्याने मृत्यू झाल्याचे निष्पन्न झाले. याप्रकरणी डेक्कन पोलीस ठाण्यात खुनाचा गुन्हा दाखल करण्यात आला होता.
पोलिसांनी गुन्हे शाखेच्या मदतीने तपास सुरू केला. आता या प्रकरणातील मुख्य आरोपी ओंकार कांबळे (वय २७, रा. धनकवडी, पर्वती) याला अटक करण्यात आली आहे. आरोपीने आपल्याकडे मृताकडून घेतलेले ७० हजार रुपये परत न केल्यामुळे वाद निर्माण झाल्याची कबुली दिली आहे.
पोलिसांची दिशाभूल करण्याचा प्रयत्न
तपासादरम्यान असेही समोर आले की, आरोपीने पोलिसांना गोंधळात टाकण्यासाठी घटनेनंतर आपले कपडे बदलले होते. याशिवाय, आरोपीची दुचाकी हडपसर येथून जप्त करण्यात आली असून तिच्यावर रक्ताचे डाग आढळले आहेत. दुचाकीच्या डिकीतून तीन मोबाइल फोनही सापडले आहेत. या सर्व पुराव्यांनंतर आरोपीवरील संशय बळकट झाला.
काय होते वादाचा कारण ?
पोलिसांनी दिलेल्या माहितीनुसार, आरोपी ओंकार कांबळे याने मृत कृषल कसबे यांच्याकडून ७० हजार रुपये उसने घेतले होते. मात्र, ही रक्कम परत करण्यास त्याने टाळाटाळ केली. यावरून दोघांमध्ये सातत्याने वाद होत होता. घटनेच्या दिवशी सकाळी दोघांची नदीपात्राजवळ भेट झाली. त्या वेळी पुन्हा रकमेबाबत तणाव निर्माण झाला. वादातून रागाच्या भरात आरोपीने तीक्ष्ण शस्त्राने कसबे यांचा गळा चिरून त्यांची हत्या केली. घटनेनंतर कांबळे तेथून पसार झाला होता.
हे पण वाचा
भारतातून यंदा १ लाख ७० हजार हाजी साहब मक्का मदिना येथे जाणार…. वाचा सविस्तर
वैभव सूर्यवंशी, मोहम्मद शमी लढत रंगणार
ऑडीओ क्लिप आणि मारहाणीचा दावा खोटा?
सप्तशृंगी मंदिरात २२ किलो चांदीची चोरी ?
पुढील तपास आणि कारवाई
सध्यापर्यंतच्या तपासात खून झाल्याच्या घटनास्थळावरून इतर कोणाचा सहभाग असल्याचे समोर आलेले नाही. डेक्कन पोलिस पुढील तपास करत असून आरोपीला न्यायालयात हजर करण्याची प्रक्रिया सुरू आहे. पोलिसांनी नागरिकांनी कोणत्याही प्रकारच्या आर्थिक व्यवहारात होणाऱ्या वादापासून सावध राहण्याचे आवाहन केले आहे. तसेच, अशा परिस्थितीत तात्काळ पोलिसांशी संपर्क साधण्याचा सल्ला दिला आहे.
