म्युझिक कॉन्सर्टमध्ये ड्रग्जच्या अतिसेवनाने दोन विद्यार्थ्यांचा मृत्यू
मुंबईच्या गोरेगाव परिसरातील नेस्को ग्राऊंडवर आयोजित एका म्युझिक कॉन्सर्टमध्ये ड्रग्जच्या अतिसेवनामुळे दोन तरुणांचा मृत्यू झाल्याची धक्कादायक घटना समोर आली आहे. या प्रकरणात आता बॉलिवूडशी संबंधित दोन व्यक्तींची नावे तपासात आली आहेत, ज्यामुळे खळबळ उडाली आहे.
पोलिस सूत्रांनी दिलेल्या माहितीनुसार, नेस्को सेंटरमध्ये पार पडलेल्या या कार्यक्रमात बॉलिवूडमधील दोन जण उपस्थित होते. पोलिसांनी सीसीटीव्ही फुटेजमध्ये या दोघांना तपासले असून, त्यांचा प्रकरणात सहभाग आहे की नाही, याचा सखोल तपास सुरू आहे. जर या दोघांची भूमिका उघडकीस आली, तर त्यांच्यावरही कायदेशीर कारवाई करण्यात येईल.
फरार आरोपी पोलादपूर येथून अटक
या प्रकरणातील मुख्य आरोपी आयुष विकी साहित्य हा घटनेनंतर फरार झाला होता. वनराई पोलीस ठाण्यात भारतीय न्याय संहिता व अंमली पदार्थ नियंत्रण कायदा १९८५ अंतर्गत गुन्हा दाखल करण्यात आला होता. अखेर पोलिसांनी पोलादपूर येथील नाकाबंदीदरम्यान आयुषला झडप घालून अटक केली. त्याच्याकडून अधिक माहिती मिळविण्यासाठी पोलीस त्याला चौकशीत आहेत.
एक्सटसी ड्रग्जचे वितरण; फॉरेन्सिक अहवालात धक्कादायक खुलासा
तपास आणि शवविच्छेदन अहवालानुसार, आरोपी आयुषने या कॉन्सर्टमध्ये ‘एक्सटसी’ या प्रकारचे अंमली पदार्थ वितरित केले होते. मृत तरुण-तरुणीसह त्यांच्या काही मित्रांनी कार्यक्रमस्थळी प्रवेश करण्यापूर्वी एक्सटसीचे सेवन केले होते. त्यानंतर कॉन्सर्टदरम्यान त्यांनी मद्यपानही केले. यामुळे अनेकांना अस्वस्थ वाटू लागले. त्यांना तातडीने रुग्णालयात दाखल करण्यात आले, मात्र रविवारी पहाटे एका तरुणाचा आणि दुपारी एका तरुणीचा मृत्यू झाला.
हे पण वाचा
शिवनिका ट्रस्टचे संचालक जितेंद्र शेळके यांचा अपघाती मृत्यू….पत्नीही ठार.. वाचा सविस्तर…
महाराष्ट्रात उष्णतेनंतर आता गारपिटीचा मोठा इशारा; शेतकऱ्यांची चिंता वाढली
मुंबईबाहेरील राज्यांशीही ड्रग्ज कनेक्शन?
पोलिसांच्या प्राथमिक तपासात असे दिसून आले आहे की, हे ड्रग्ज कनेक्शन केवळ मुंबईपुरते मर्यादित नसून महाराष्ट्राबाहेरील राज्यांशीही जोडले गेले आहे. पोलीस या दिशेनेही तपास करत आहेत. दरम्यान, या घटनेनंतर पोलिसांनी सहा विशेष पथके तयार केली आहेत, जी संपूर्ण प्रकरणाचा तपास करीत आहेत.
राज्य सरकारवर टीकेची झोड; विरोधक आक्रमक
नेस्को सेंटरवर ११ एप्रिल रोजी (शनिवारी) आयोजित डीजे कॉन्सर्टमध्ये मोठ्या संख्येने तरुण-तरुणी सहभागी झाले होते. मात्र, या घटनेनंतर राज्य सरकार आणि पोलिस प्रशासनावर टीकेची झोड उठली आहे. विरोधकांनी सत्ताधाऱ्यांवर निशाणा साधत प्रश्न उपस्थित केले आहेत की, अशा कार्यक्रमांवर का बंदी घालण्यात येत नाही? पोलीस या प्रकरणाचा अधिक तपास करीत असून लवकरच उर्वरित आरोपींनाही अटक करण्यात येईल, असे संकेत आहेत.
Comments 1