प्रेमाच्या नावावर ५०० महिलांची फसवणूक – पश्चिम बंगालमधील धक्कादायक प्रकार
सोशल मीडिया आणि डेटिंग अॅप्सच्या वाढत्या वापरामुळे सायबर फसवणुकीचे प्रमाणही वाढले आहे. अमरावतीतील तरुणींच्या फसवणुकीच्या प्रकरणानंतर आता पश्चिम बंगालमधून त्याहूनही मोठा आणि हादरवणारा खुलासा झाला आहे. एका तरुणाने प्रेमाचे आमिष दाखवून ५०० हून अधिक महिलांची आर्थिक आणि लैंगिक फसवणूक केल्याचे समोर आले आहे.
नेमकं प्रकरण काय?
पश्चिम बंगालमध्ये घडलेल्या या धक्कादायक प्रकरणात आरोपीचे नाव आनंद असून तो मूळचा तिथलाच राहणारा आहे. आरोपी आनंदने विविध मॅट्रिमोनियल साइट्स आणि डेटिंग अॅप्सचा वापर करून महिलांशी संपर्क साधला. खोटी ओळख, खोटी नावे आणि आकर्षक प्रोफाइलच्या माध्यमातून तो महिलांना आपल्या प्रेमाच्या जाळ्यात ओढत असे.
एकदा विश्वास संपादन झाल्यानंतर तो महिलांकडून मोठ्या प्रमाणात पैसे उकळत असे. अनेक महिलांचे असंमत फोटो आणि व्हिडीओही त्याने आपल्याकडे साठवून ठेवल्याचा दावा केला जात आहे. आतापर्यंत त्याने महिलांकडून २ कोटी रुपयांहून अधिक रक्कम लुबाडल्याची माहिती समोर आली आहे.
ही फसवणूक उघडकीस कशी आली?
या संपूर्ण प्रकरणाचा पर्दाफाश झाला तो एका महिलेने केलेल्या तक्रारीमुळे. आरोपी आनंद कुमार याने ‘वैभव अरोडा’ या बनावट नावाने एका डेटिंग अॅपवर प्रोफाइल तयार केले होते. याच नावाने त्याने फसवे इंस्टाग्राम खातेही सुरू केले होते.
या खात्याच्या माध्यमातून त्याने एका महिलेशी चॅटिंग सुरू केली आणि हळूहळू तिच्याशी व्हॉट्सअॅपवर बोलू लागला. काही दिवसांनंतर त्याने त्या महिलेला सांगितले की, “माझ्या मित्राला तातडीने पैशांची गरज आहे.” विश्वासाच्या जाळ्यात अडकलेल्या महिलेने त्याला पैसे दिले. मात्र, जेव्हा तिने पैसे परत मागितले तेव्हा आरोपीने नकार दिला आणि तिला धमकावण्यास सुरुवात केली.
ही बाब गंभीर वाटल्याने त्या महिलेने त्वरित पोलिसांत तक्रार दाखल केली. त्यानंतर दिल्ली पोलिसांनी तपास सुरू करत आरोपीला ताब्यात घेतले.
हे पण वाचा
गर्भपाताच्या गोळ्याच्या अति सेवनाने तरुणीचा मृत्यू… वाचा सविस्तर
मुंबई महापालिकेच्या जागेत खुलेआम अघोरी कृत्य.. वाचा सविस्तर
दिल्ली पोलिसांची कारवाई..
सध्या या प्रकरणाचा तपास दिल्ली पोलीस करत आहेत. आरोपी आनंदला अटक करण्यात आली असून त्याच्याकडील मोबाईल, लॅपटॉप आणि इतर डिजिटल पुरावे जप्त करण्यात आले आहेत. पोलिसांच्या प्राथमिक तपासात आरोपीने ५०० हून अधिक महिलांशी अशाप्रकारे फसवणूक केल्याचे स्पष्ट झाले आहे.
तसेच, त्याच्याकडे अनेक महिलांचे आक्षेपार्ह फोटो आणि व्हिडीओ आढळून आले आहेत. पोलीस या सर्व महिलांशी संपर्क साधत असून अधिक तपास सुरू आहे.
महिलांनी काळजी घ्यावी
तज्ज्ञांच्या मते, डेटिंग अॅप्स किंवा मॅट्रिमोनियल साइट्सवर अनोळखी व्यक्तींशी बोलताना अत्यंत सावधगिरी बाळगणे गरजेचे आहे. कधीही लगेच आर्थिक व्यवहार करू नये. कोणत्याही प्रेमप्रकरणात विश्वास ठेवण्यापूर्वी त्या व्यक्तीची संपूर्ण पार्श्वभूमी तपासावी. तसेच, फसवणूक झाल्यास त्वरित जवळच्या पोलीस ठाण्यात तक्रार दाखल करावी.
प्रेमाच्या नावावर होणाऱ्या फसवणुकीचे हे प्रकरण समाजासाठी एक धक्कादायक उदाहरण आहे. पाचशेहून अधिक महिलांच्या भावनांचा आणि पैशांचा गैरफायदा घेणाऱ्या आरोपीवर कठोर कारवाई होणे गरजेचे आहे. सायबर क्राइमच्या वाढत्या घटनांमध्ये महिलांनी सजग राहणे आणि वेळीच पोलिसांची मदत घेणे अत्यंत आवश्यक आहे.
Comments 1