सोलापूर जिल्ह्यात विनापरवाना पुतळे उभारल्यास थेट एफआयआर; ४ तासांत हटविण्याचा प्रशासनाचा कठोर निर्णय

सोलापूर जिल्ह्यात आता कोणीही विनापरवाना पुतळा उभारला तर त्याला थेट गुन्हा दाखल होण्यापासून रोखता येणार नाही. जिल्हा प्रशासनाने यासंदर्भात अत्यंत कठोर भूमिका घेतली आहे. अनधिकृतपणे बसविण्यात आलेल्या कोणत्याही पुतळ्याची माहिती मिळताच चार तासांच्या आत तो हटविण्यात येणार आहे. तसेच, अशा पुतळ्याबाबतची माहिती लपविणाऱ्या पोलीस पाटलाला सात दिवसांत निलंबित करण्यात येईल, असा स्पष्ट इशारा देण्यात आला आहे.

जिल्हाधिकारी, पोलीस अधीक्षक आणि जिल्हा परिषदेचे मुख्य कार्यकारी अधिकारी यांनी संयुक्त परिपत्रक जारी करून हे निर्देश दिले आहेत. गेल्या महिन्याभरात जिल्ह्यात विनापरवानगीने अनेक ठिकाणी पुतळे उभारण्यात आल्यानंतर प्रशासनाने ही भूमिका घेतली आहे.

अनधिकृत पुतळ्यांवर कारवाईची प्रक्रिया स्पष्ट

या नव्या निर्णयानुसार, कोठेही विनापरवाना पुतळा उभारल्याची माहिती मिळताच एका तासाच्या आत उपविभागीय अधिकारी, संबंधित तहसीलदार आणि पोलीस प्रशासनाने घटनास्थळी भेट देणे बंधनकारक असेल. त्यानंतर पुढील चार तासांत तो पुतळा हटविण्यात येईल आणि याप्रकरणी गुन्हा दाखल करण्यात येईल.

जर एखाद्या गावातील पोलीस पाटलाने आपल्या हद्दीतील अनधिकृत पुतळ्याची माहिती वरिष्ठांना न दिल्यास त्याच्यावर सात दिवसांत निलंबनाची कारवाई केली जाईल. तसेच, घटनेची पूर्वकल्पना न देणाऱ्या ग्रामपंचायत सदस्यांविरुद्धही अपात्रतेचा प्रस्ताव सादर करण्यात येणार आहे.

पुतळा बसविण्यासाठी नऊ नियम अनिवार्य

जिल्हा प्रशासनाने कोणत्याही महापुरुषाचा पुतळा उभारण्यासाठी नऊ महत्त्वाच्या अटी व नियम जारी केले आहेत. यामध्ये पुढील कागदपत्रे सादर करणे बंधनकारक आहे:

• जागेच्या मालकीचे पुरावे

• ग्रामपंचायत किंवा नगरपंचायतीचा संबंधित ठराव

• पोलिसांचा अहवाल

• कला संचालनालयाचा अहवाल

• सार्वजनिक बांधकाम विभागाचे ना-हरकत पत्र

या सर्व नियमांची पूर्तता न करता जर कोणी पुतळा उभारला तर त्याच्यावर थेट कारवाई करण्यात येईल.

पुतळा निर्मात्यांनाही इशारा

जिल्हाधिकारी एस. कार्तिकेयन यांनी पुतळे तयार करणाऱ्या कारखानदारांनाही स्पष्ट इशारा दिला आहे. अधिकृत परवानगीशिवाय कोणालाही पुतळा विकू नये, असे निर्देश त्यांनी दिले आहेत. याचे उल्लंघन करणाऱ्या कारखान्याला तात्काळ सील करण्यात येईल.

‘भोसे पॅटर्न’चा यशस्वी प्रयोग

पालकमंत्री जयकुमार गोरे यांनी अलीकडेच माढा तालुक्यातील अंजनगाव खेलोबा येथील अनधिकृत पुतळ्याच्या वादानंतर प्रशासनाशी बैठक घेऊन एक नवा तोडगा सुचविला होता. त्यांनी सांगितले की, ग्रामस्थांना विश्वासात घेऊन अनधिकृत पुतळे काढावेत आणि नंतर कायदेशीर परवानगी घेऊन ते वाजतगाजत स्थापन करावेत.

या सूचनेनुसार पंढरपूर तालुक्यातील भोसे येथे पहिले यश मिळाले. येथील ग्रामस्थांनी स्वतः पुढाकार घेऊन अनधिकृत छत्रपती शिवाजी महाराजांचा पुतळा हटविला आणि परवानगीसाठी कागदपत्रे दाखल करण्यास सुरुवात केली. यालाच ‘भोसे पॅटर्न’ म्हणून संबोधले जात आहे.

हे पण वाचा

Buldhana news : शिक्षिकेच्या अपघाती मृत्यूचे प्रकरण हत्येकडे वळले, पतीसह तिघांना अटक

मोडलिंबमध्ये नवा वाद

दरम्यान, मोडलिंब येथे अज्ञात व्यक्तींनी दोन दिवसांपूर्वी डॉ. बाबासाहेब आंबेडकर यांचा पुतळा अनधिकृतपणे उभारल्याची घटना समोर आली आहे. यापूर्वीच येथे छत्रपती शिवाजी महाराजांचा पुतळा होता. आता या दुसऱ्या पुतळ्यामुळे परिसरात तणाव निर्माण झाला असून प्रशासनाने या प्रकरणाची दखल घेण्यास सुरुवात केली आहे.

जिल्हाधिकारी कार्तिकेयन आणि पोलीस अधीक्षक अतुल कुलकर्णी यांच्या मार्गदर्शनाखाली प्रशासनाने जिल्ह्यातील सर्व अनधिकृत पुतळ्यांची माहिती गोळा करण्यास सुरुवात केली आहे. पुढील दोन महिन्यांत या सर्व पुतळ्यांना कायदेशीर परवानगी मिळवून देण्यासाठी प्रशासन ग्रामस्थांना मदत करणार आहे. मात्र, त्यापूर्वी अनधिकृत पुतळे हटविणे अनिवार्य असल्याचे स्पष्ट करण्यात आले आहे.